ਪੰਜਾਬੀ ਸਾਹਿਤ ਅਕੈਡਮੀ ਨਿਊ ਯਾਰਕ ਦੀ ਮਾਰਚ ਦੀ ਮੀਟਿੰਗ

ਨਿਊ ਯਾਰਕ - ਪੰਜਾਬੀ ਸਾਹਿਤ ਅਕੈਡਮੀ ਨਿਊ ਯਾਰਕ ਦੀ ਮਾਰਚ 2008 ਦੀ ਮੀਟਿੰਗ ਪੰਜਾਬੀ ਪੱਤਰਕਾਰ ਅਵਤਾਰ ਸ਼ੇਰਪੁਰੀ ਵਲੋਂ 8 ਮਾਰਚ ਸਨਿਚਰਵਾਰ ਨੂੰ ਕਰਵਾਈ ਗਈ ਜਿਸ ਵਾਸਤੇ ਭੁਪਿੰਦਰ ਸਿੰਘ ਅਤੇ ਮਨਜੀਤ ਸਿੰਘ ਨੇ ਆਪਣਾ ਨਿਵਾਸ ਅਸਥਾਨ ਭੇਂਟ ਕੀਤਾ। ਇਸ ਮੀਟਿੰਗ ਦੀ ਕਾਰਵਾਈ ਨੌਜਵਾਨ ਪੰਜਾਬੀ ਸ਼ਾਇਰ ਅਤੇ ਗੀਤਕਾਰ ਦੀਪ ਮੰਗਲੀ ਨੇ ਬਹੁਤ ਹੀ ਨਿਪੁੰਨਤਾ ਨਾਲ ਨਿਭਾਈ।

                   ਸਭ ਤੋਂ ਪਹਿਲਾਂ ਜੱਜ ਜੀਤ ਸਿੰਘ ਨਾਹਲ ਜੀ ਮੈਂਬਰਾਂ ਦੇ ਰੂਬਰੂ ਹੋਏ। ਉਨ੍ਹਾਂ ਦੇ ਬੋਲਣ ਤੋਂ ਪਹਿਲਾਂ ਉਨ੍ਹਾਂ ਬਾਰੇ ਕੁਝ ਸ਼ਬਦ ਪ੍ਰੇਮ ਮਾਨ, ਰਣਧੀਰ ਸਿੰਘ, ਅਤੇ ਸੁਰਿੰਦਰ ਸੋਹਲ ਨੇ ਕਹੇ। ਉਨ੍ਹਾਂ ਨੇ ਬਹੁਤ ਹੀ ਅੱਛੇ ਢੰਗ ਨਾਲ ਆਪਣੀ ਜ਼ਿੰਦਗੀ ਦੇ ਸਫ਼ਰ ਦੀਆਂ ਕੁਝ ਕਹਾਣੀਆਂ ਦਾ ਜ਼ਿਕਰ ਕੀਤਾ। ਜੱਜ ਜੀ ਅਫ਼ਰੀਕਾ ਦੇ ਮੁਲਕ ਕੀਨੀਆਂ ਵਿੱਚ ਜੰਮੇ ਅਤੇ ਪਲੇ ਸਨ। ਜੁਆਨੀ ਦੀ ਉਮਰ ਵਿੱਚ ਹੀ ਉਹ ਇੰਗਲੈਂਡ ਚਲੇ ਗਏ ਜਿੱਥੇ ਉਨ੍ਹਾਂ ਨੇ ਬੈਰਿਸਟਰ ਦੇ ਤੌਰ ਤੇ ਪਰੈਕਟਿਸ ਕੀਤੀ। ਫਿਰ ਜੱਜ ਸਾਹਿਬ ਬਲੀਸ ਮੁਲਕ ਵਿੱਚ ਜੱਜ ਰਹੇ। ਕੁਝ ਸਾਲ ਪਹਿਲਾਂ ਜੱਜ ਸਾਹਿਬ ਉੱਥੋਂ ਰੀਟਾਇਰ ਹੋ ਕੇ ਨਿਊ ਯਾਰਕ ਵਿੱਚ ਆ ਵਸੇ। ਜੱਜ ਸਾਹਿਬ ਹਿੰਦੁਸਤਾਨ ਸਿਰਫ਼ ਇਕ ਵਾਰੀ ਹੀ ਗਏ ਹਨ ਜਦੋਂ ਉਹ ਆਪਣੇ ਬਹੁਤ ਪਿਆਰੇ ਦੋਸਤ ਡਾ. ਰਾਮ ਜੀ ਦਾਸ ਸੇਠੀ 'ਮਹਿਤਾਬ' ਦੇ ਲੜਕੇ ਦੇ ਵਿਆਹ ਤੇ ਬੰਬਈ ਗਏ ਸਨ। ਉਸ ਵੇਲੇ ਉਹ ਪਹਿਲੀ ਵਾਰੀ ਪੰਜਾਬ ਵੀ ਗਏ ਸਨ ਅਤੇ ਪਹਿਲੀ ਵਾਰੀ ਟਾਂਗੇ ਦੀ ਸਵਾਰੀ ਵੀ ਕੀਤੀ ਸੀ। ਇਸਦੇ ਬਾਵਜੂਦ ਕਿ ਜੱਜ ਸਾਹਿਬ ਪੰਜਾਬ ਵਿੱਚ ਕਦੇ ਨਹੀਂ ਰਹੇ ਅਤੇ ਪੰਜਾਬ ਵਿੱਚ ਗਏ ਵੀ ਇਕੋ ਵਾਰੀ ਹਨ, ਉਹ ਪੰਜਾਬੀ ਇੰਨੀ ਖ਼ੂਬਸੂਰਤੀ ਨਾਲ ਬੋਲਦੇ ਹਨ ਕਿ ਕੋਈ ਸੋਚ ਵੀ ਨਹੀਂ ਸਕਦਾ ਕਿ ਉਹ ਪੰਜਾਬ ਵਿੱਚ ਨਹੀਂ ਰਹੇ। ਜੱਜ ਸਾਹਿਬ ਪੰਜਾਬੀ ਸਾਹਿਤ ਵੀ ਬਹੁਤ ਪੜ੍ਹਦੇ ਹਨ। ਉਨ੍ਹਾਂ ਦੇ ਘਰ ਪੰਜਾਬੀ ਦੀਆਂ ਅਨੇਕਾਂ ਕਿਤਾਬਾਂ ਹਨ।

                   ਇਸ ਤੋਂ ਬਾਦ ਮਧੂ ਬੇਦੀ ਜੀ, ਸਤਿੰਦਰ ਕੌਰ, ਰਣਧੀਰ ਸਿੰਘ, ਪਰਮਜੀਤ ਸਾਗਰ, ਰਾਜਿੰਦਰ ਜਿੰਦ, ਬਲਬੀਰ ਡੁਮੇਲੀ, ਜਸਬੀਰ ਡੁਮੇਲੀ, ਸੁਰਿੰਦਰ ਸੋਹਲ, ਅਮਰਜੀਤ ਘਣਗਸ, ਅਤੇ ਦੀਪ ਮੰਗਲੀ ਨੇ ਆਪਣੀਆਂ ਆਪਣੀਆਂ ਕਵਿਤਾਵਾਂ ਸੁਣਾਈਆਂ। ਸੁਰਿੰਦਰ ਸਿੰਘ ਬੈਦਵਾਨ ਨੇ ਆਪਣੀ ਕਹਾਣੀ 'ਬਸੰਤ ਪੰਚਮੀ' ਪੜ੍ਹੀ। ਜਿਵੇਂ ਕਿ ਅਕੈਡਮੀ ਦੀ ਰੀਤ ਹੈ, ਕਵਿਤਾਵਾਂ ਦੇ ਦੌਰ ਦੇ ਸਭ ਤੋਂ ਅਖੀਰ ਵਿੱਚ ਮਿਸਿਜ਼ ਮਾਰਕੋ ਜੀ ਨੇ ਸਰਦਾਰ ਮਨੋਹਰ ਸਿੰਘ ਮਾਰਕੋ ਜੀ ਦੀਆਂ ਰਚਨਾਵਾਂ ਪੜ੍ਹੀਆਂ। ਅਵਤਾਰ ਸ਼ੇਰਪੁਰੀ ਅਤੇ ਮੀਟਿੰਗ ਵਿੱਚ ਪਹਿਲੀ ਵਾਰ ਆਏ ਮਹਿਮਾਨ ਹਰਪਰੀਤ ਸਿੰਘ ਤੂਰ ਅਤੇ ਨਿਰਮਲ ਸਿੰਘ ਵੀ ਇਸ ਮੀਟਿੰਗ ਵਿੱਚ ਬੋਲੇ।  ਅਖੀਰ ਵਿੱਚ ਰੀਤਾ ਕੋਹਲੀ ਨੇ ਆਪਣੇ ਗੀਤਾਂ ਨਾਲ ਖ਼ੂਬ ਰੰਗ ਬੰਨਿਆਂ। ਰੀਤਾ ਜੀ ਨੇ ਪੰਜਾਬੀ ਗੀਤ 'ਮੇਲੇ ਚਲਿਆਂ ਤਾਂ ਲੈ ਕੇ ਆਵੀਂ ਚੂੜੀਆਂ' ਅਤੇ ਗ਼ਾਲਿਬ ਦੀ ਪੰਜਾਬੀ ਵਿੱਚ ਉਲਥਾਈ ਗ਼ਜ਼ਲ 'ਮੇਰੇ ਸ਼ੌਕ ਦਾ ਨਹੀਂ ਇਤਬਾਰ ਤੈਨੂੰ' ਗਾਏ।

                   ਇਸ ਮੀਟਿੰਗ ਵਿੱਚ ਅਮਰਜੀਤ ਸਿੰਘ ਉੱਪਲ ਦੀ ਕਵਿਤਾ ਦੀ ਨਵੀਂ ਛਪੀ ਕਿਤਾਬ ''ਬੰਸਰੀ ਖ਼ਾਮੋਸ਼ ਹੈ" ਅਕੈਡਮੀ ਦੇ ਜ਼ਿੰਦਗੀ ਭਰ ਲਈ ਪ੍ਰਧਾਨ ਮਿਸਿਜ਼ ਮਾਰਕੋ ਜੀ, ਰਣਧੀਰ ਸਿੰਘ, ਪ੍ਰੇਮ ਮਾਨ, ਅਤੇ ਪਰਮਜੀਤ ਸਾਗਰ ਨੇ ਰਲੀਜ਼ ਕੀਤੀ। ਪਰਮਜੀਤ ਸਾਗਰ ਨੇ ਇਸ ਕਿਤਾਬ ਵਿੱਚੋਂ ਇਕ ਖ਼ੂਬਸੂਰਤ ਕਵਿਤਾ 'ਬਾਜ਼ਾਰ 'ਚ ਖੜੀ ਕੁੜੀ' ਪੜ੍ਹੀ। ਅਮਰਜੀਤ ਉੱਪਲ ਦਾ ਇਹ ਪਹਿਲਾ ਕਵਿਤਾ ਸੰਗ੍ਰਹਿ ਹੈ। ਉੱਪਲ ਦੀਆਂ ਕਵਿਤਾਵਾਂ ਬਹੁਤ ਹੀੇ ਯਥਾਰਥਵਾਦੀ ਹਨ, ਅਤੇ ਉਹ ਮਨੁੱਖੀ ਦਰਦ ਨੂੰ ਬੜੀ ਖ਼ੂਬਸੂਰਤੀ ਨਾਲ ਬਿਆਨ ਕਰਦੀਆਂ ਹਨ।

                   ਇਸ ਮੀਟਿੰਗ ਵਿੱਚ ਮਿਸਿਜ਼ ਨਾਹਲ, ਮਿਸਿਜ਼ ਸੋਹਲ, ਡਾ. ਰਣਜੀਤ ਗਰੋਵਰ, ਵਰਿੰਦਰ ਸੋਨੀ, ਅਵਤਾਰ ਸ਼ੇਰਪੁਰੀ, ਰੌਕੀ ਸਾਈ, ਅਜਮੇਰ ਕੌਰ, ਸਰਬਜੀਤ ਮਾਨ, ਸਿਮਰਨ ਕੌਰ, ਚਰਨਜੀਤ ਸਿੰਘ, ਗੁਰਮਾਨ ਸਿੰਘ, ਸਿਕੰਦਰ ਸਿੰਘ, ਜਗਮੋਹਣ ਸਿੰਘ, ਮੀਨਾ ਸਿੰਘ, ਸਵਤੰਤਰ ਸਿੰਘ, ਪਰਦੁੱਮਣ ਸਿੰਘ, ਅਤੇ ਦਵਿੰਦਰ ਸਿੰਘ ਵੀ ਹਾਜ਼ਰ ਸਨ।